Hér eru taldar upp helstu ættkvíslar og tegundir sumarblóma sem eru í ræktun hérlendis. Valið var að þessu sinni að raða plöntunum upp í stafrófsröð latneskra heita, enda eru meiri líkur á því að það hjálpi eitthvað til þegar fólk fer út að leita að góðum tegundum í blómabúðum eða í blómamiðstöðvum.

Sumarblómaræktun í skammdeginu er upplagt áhugamál fyrir alla fjölskylduna. Gleði og ánægja felst í því að sá til fallegra blóma, sjá þau vaxa og dafna og planta þeim að lokum út í garðinn að vori.

Sumarblóm eru mjög áberandi í görðum frá vori til hausts. Þau má rækta í beðum, pottum, kerjum eða kössum á svölum eða veröndum. Allsstaðar er pláss fyrir nokkur falleg sumarblóm. Treysta má því að vel upp alin sumarblóm blómgast nánast allt sumarið séu stöðugur gleðigjafi með litadýrð sinni.

Margar mjög góðar garðplöntur eru tvíærar, en orðið skýrir ævilengd plöntunnar og einnig það að ala þarf hana upp á fyrra ári en hún blómstrar síðan á seinna árinu. Þær eru margar fyrirtaks sumarblóm og auðveldar í ræktun.

Sumarblóm eru til ýmissa hluta nýtileg í garðinum og skreyta hann með ríkulegri blómgun allt sumarið. Þau má meðal annars nota í ker og kassa, til uppfyllingar í fjölæru beðin eða steinhæðina og ekki má gleyma að fjölmörg þeirra henta vel til afskurðar og eru þá bæði til prýði innan húss og utan.