Silene uniflora

Ættkvísl

Silene

Nafn

uniflora

Íslenskt nafn

Holurt

Ætt

Caryophyllaceae (Hjartagrasaætt)

Samheiti

Cucubalus alpinus Lam.Oberna alpina (Lam.) Ikonn.Oberna uniflora (Roth) Ikonn.Silene maritima With.Silene inflata subsp. maritima (With.) CajanderSilene maritima subsp. alpina (Lam.) NymanSilene vulgaris subsp. maritima (With.) Á. Löve & D. Löve

Lífsform

Fjölær jurt

Kjörlendi

Vex á melum og söndum. Algeng um allt land þar sem malarborinn jarðvegur eða vikur er fyrir hendi, ekki síst á öræfunum.

Blómalitur

Hvítur (gulhvítur)

Blómgunartími

Júní-júlí

Hæð

0.10-0.30 m

Vaxtarlag

Fjölær planta með mörgum greinóttum, uppsveigðum eða jarðlægum stönglum, sem vaxa upp af sömu rót, 10-30 sm á hæð. Öll er plantan hárlaus.

Lýsing

Laufblöðin gagnstæð, kjötkennd, lensulaga eða mjóoddbaugótt, heilrend, lensulaga, 1-2 sm á lengd. Blómin fimmdeild, stór, fá saman eða stök á stöngulendum. Krónan hvít, um 2 sm í þvermál. Krónublöðin 1,5-2,5 sm á lengd, klofin í oddinn og þá talað um að krónublöð séu sýld. Bikarinn um 1,5 sm á lengd, oftast fimmtenntur, uppblásinn og samblaða, klukkulaga, bleikfjólublár með dekkra æðaneti. Í hverju blómi eru 10 fræflar og ein fræva. Fræflar með dökkum frjóhirslum og fræva með fjórum til sex stílum. Hýðið hnöttótt, fremur dökkt, egg- eða hjartalaga. Blómgast í júní-júlí. LÍK/LÍKAR: Engar, auðþekkt á útblásnum bikar.

Heimildir

1,2,3,9, HKr

Reynsla

“Rótina má mala og nota sem mjöl. Með blómunum var kláði læknaður. M. a. vegna þess að tegundin er algeng, vex þar sem ettir henni er tekið og hefur sérkennilegan uppblásinn bikar, eru til á henni mörg nöfn. Af þeim má nefna: Blöðrujurt, fálkapungur, flugnapungur, galtarpungur, melapungur, prestapungur og pungagras. Nafnið hjartagras er dregið af lögun aldina en laxerarfi af örvandi niðurgangsverkun plöntunnar. Börn kalla hana oft flugnabú eða flugublóm, af því að flugur álpast niður í belgvíðan bikarinn. Útbreiddur misskilningur er að plantan sé flugnaæta.” (Ág.H.)

Útbreiðsla

Algeng um mestallt landið. Önnur náttúruleg heimkynni t.d.: Evrópa, Nýja Sjáland, Rússland, N Ameríka.